Camlesi, Cymunedau a Llesiant

Mae cyfoeth o fywyd gwyllt i’w weld ar hyd y rhan honno o Gamlas Maldwyn sydd yng Nghymru, yn ei dyfroedd glân, yn y llystyfiant ar ei hymyl ac yn y llain ar hyd y llwybr hawlio. Mae'n llawn adar dŵr, fel Elyrch Mud a Ieir Bach yr Hesg, mae dyfrgwn yn ei defnyddio'n aml i fwydo, gwelwyd Llygod Dŵr sy’n gynyddol brin yma hefyd, ac yn yr haf mae'r awyr yn dod yn fyw gyda gwas y neidr a mursennod yn gwibio o le i le.

Fel rhan o’r prosiect, rydym wedi creu ardal ‘Chwarae Natur’ newydd yng Ngwarchodfa Natur Llyn Coed y Dinas yn Y Trallwng. Mae’r ardal chwarae awyr agored yn cynnwys deunyddiau naturiol – gan gynnwys coed o warchodfa natur YNM gerllaw, yng Nghoed Dolforwyn, lle mae gwaith adfer yn digwydd ar y coetir hynafol – ac offer a wnaethpwyd o bren i gydfynd â’r amgylchfyd gwyllt, sydd ar yr un pryd, yn hwyluso ymgysylltu â natur a’r awyr agored. Gyda meinciau pren, cylch o stolion pren gwledig, ‘ystafell synhwyraidd ar thema’r enfys’ a chegin fwd, mae’r ardal awyr agored yn cynnig lle perffaith i blant a’u teuluoedd fwynhau chwarae dychmygus a chyffrous yn erbyn cefnlen ysbrydoledig y warchodfa natur. Yma gall meddyliau’r plant chwilota, creu a darganfod, wrth chwilio am chwilod, gwylio adar, casglu dail a gwylio bywyd gwyllt – heb sôn am fwynhau’r mwd, bod yn flêr a chael hwyl! Bydd y lle neilltuol hwn ar agor i’r cyhoedd sy’n ymweld â Llyn Coed y Dinas, a chynhelir digwyddiadau sy’n addas i’r teulu cyfan, ymweliadau addysgol ar gyfer ysgolion lleol, a sesiynau estyn allan ar gyfer pobl ifanc a gyflwynir gan Ymddiriedolaeth Natur Maldwyn yma hefyd.